അടിമാലി; മാങ്കുളത്തെ വിനോദസഞ്ചാര കേന്ദ്രങ്ങളില്‍ അപകട മരണങ്ങള്‍ തുടര്‍ക്കഥയായി.ദിവസങ്ങള്‍ക്കുള്ളില്‍ 2 ജീവനുകളാണ് ഇവിടെ പൊലിഞ്ഞത്.പെരുമ്പന്‍കുത്ത് വ്യൂപോയിന്റില്‍ നിന്നും കൊക്കയില്‍ പതിച്ച് കാലടി കാഞ്ഞൂര്‍ സ്വദേശി ജോഷി(49) ഇന്നലെ മരണപ്പെട്ടു.ഈ മാസം 9-ന് തലയോലപ്പറമ്പ് കീഴൂര്‍ മടക്കത്തടത്തില്‍ വീട്ടില്‍ ജിഷ്ണുഷാജി(22)മാങ്കുളം ആനക്കുളം വല്യപാറക്കുട്ടിയില്‍ പുഴയില്‍ ഒഴുക്കില്‍പ്പെട്ട് മരണമടഞ്ഞിരുന്നു.

വെള്ളച്ചാട്ടത്തിന് മുകളില്‍ നിന്നും കാല്‍വഴുതി കൊക്കയിലേക്ക് പതിച്ചതിനെത്തുടര്‍ന്നുള്ള ഗുരുതര പരിക്കാണ് ജോഷിയുടെ ജീവനെടുത്തത്.ജോഷി ഉള്‍പ്പെടെ 10 അംഗ സംഘമാണ് വെള്ളച്ചാട്ടം കാണാന്‍ എത്തിയത്.

ഒഴുകിയെത്തുന്ന വെള്ളം താഴേക്ക് പതിക്കുന്ന ഭാഗത്ത് നിന്ന് വെള്ളച്ചാട്ടം കണ്ടാസ്വദിക്കാമെന്നതാണ് പെരുമമ്പന്‍കുത്ത് വെള്ളച്ചാട്ടത്തിന്റെ ആകര്‍ഷണീയത.ഇവിടെ ഒരു വ്യൂപോയിന്റും ഉണ്ട്. ഇവിടെ എത്താനുള്ള ശ്രമത്തിനിടെ ജോഷി വഴുവഴുപ്പുള്ള പാറയില്‍ നിന്നും ബാലന്‍സ്  തെറ്റി കൊക്കയില്‍ പതിക്കുകയായിരുന്നു.

വെള്ളച്ചാട്ടത്തിന്റെ താഴെ പാറക്കെട്ടുകള്‍ നിറഞ്ഞ വലിയ കൊക്കയാണ്.
ഈ ഭാഗത്തേക്കാണ് വെള്ളച്ചാട്ടത്തിന് മുകളില്‍ നിന്നും ജോഷി കാല്‍വഴുതി വീണത്.വീഴ്ച്ചയുടെ ആഘാതത്തില്‍ തലക്കുള്‍പ്പെടെ വലിയ മുറിവ് സംഭവിച്ചിരുന്നു.

അപകടം നടന്ന ഉടനെ സമീപവാസികള്‍ ചേര്‍ന്ന് വെള്ളച്ചാട്ടത്തിന് അരികിലൂടെ കൊക്കയിലേക്ക് ഇറങ്ങുകയും ഏറെ ശ്രമകരമായി ജോഷിയെ മുകളില്‍ എത്തിക്കുകയുമായിരുന്നു.തുടര്‍ന്ന് ഇന്നലെ ഉച്ചയോടെ മൃതദേഹം അടിമാലി താലൂക്കാശുപത്രി മോര്‍ച്ചറിയിലേക്ക് മാറ്റിയിരുന്നു.ഭാര്യ. ബീന, മക്കള്‍.അഭിനവ് ,നവീന്‍.

തലയോലപ്പറമ്പ് ഡി.ബി. കോളജ് രണ്ടാം വര്‍ഷ പി ജി. വിദ്യാര്‍ഥിയായിരുന്നു ജിഷ്ണു. ആനക്കുളം വല്യപാറക്കുട്ടി പുഴയില്‍ കുളിയ്ക്കാനിറങ്ങിയപ്പോള്‍ ഒഴുക്കില്‍പ്പെടുകയായിരുന്നു.

കുടെയുണ്ടായിരുന്ന വിദ്യാര്‍ത്ഥികള്‍ ബഹളം വയ്ക്കുന്നത് കേട്ട് അടുത്തുണ്ടായിരുന്നവര്‍ ഓടിയെത്തി കരയ്ക്കെത്തിച്ചെങ്കിലും ജീവന്‍ രക്ഷയ്ക്കാനായില്ല.15 വിദ്യാര്‍ത്ഥികള്‍ ഉള്‍പ്പെടെ 17 പേരാണ് വിനോദയാത്ര സംഘത്തില്‍ ഉണ്ടായിരുന്നത്.

കിലോമീറ്ററുകളോളം വനത്തിലൂടെ നടന്നാണ് വിനോദയാത്ര സംഘം കുറത്തിക്കുടി ആദിവാസി കോളനിക്ക് സമീപത്തുള്ള അപകടം നടന്ന പുഴയുടെ ഭാഗത്തെത്തിയത്.സ്ഥല പരിചയമില്ലാത്തതാണ് ഇവിടെ വിനോദ സഞ്ചാരികള്‍ ഇവിടെ അപകടത്തില്‍പ്പെടാന്‍ കാരണമെന്നാണ് പൊതുവെയുള്ള വിലയിരുത്തല്‍.സന്ദര്‍ശകര്‍ക്ക് പരിചയ സമ്പന്നരായ ഗൈഡുകളുടെ സേവനം ലഭിച്ചാല്‍ ദുരന്തങ്ങള്‍ ഒഴിവാക്കാന്‍ കഴിയുമെന്നാണ് നാട്ടുകാരുടെ വിലയിരുത്തല്‍.

1 / 1

❮ ❯