പാലക്കാട്: മലമ്പുഴ ചെറാട് മലയില്‍ 700 അടിയോളം താഴെ പാറ ഇടുക്കില്‍ കുടുങ്ങിയ ബാബുവിനെ സൈനീകര്‍ രക്ഷപെടുത്തി മലമുകളില്‍ എത്തിച്ചു.തന്നെ രക്ഷിച്ച സൈനീകര്‍ക്ക് മുത്തം നല്‍കിയും അവര്‍ക്കൊപ്പം ഭാരത് മാത കീജെയ് വിളിച്ചും ബാബു സന്തോഷം പങ്കിടുന്ന ദൃശ്യങ്ങള്‍ പുറത്തുവന്നു. ഹെലികോപ്റ്ററില്‍ കഞ്ചിക്കോട്ട് എത്തിച്ച ശേഷം ജില്ല ആശുപത്രിയിലേയ്ക്ക് മാറ്റുമെന്നാണ് സൂചന.

രാവിലെ 10 മണിയോടടുത്ത് കരസേന സംഘത്തിലെ ബാല എന്ന ഉദ്യോഗസ്ഥന്‍ വടംവഴി താഴേയ്ക്കിറങ്ങി ബാബുവിന് വെള്ളവും ഭക്ഷണവും എത്തിച്ചിരുന്നു.തുടര്‍ന്ന് സുരക്ഷ ബെല്‍റ്റുമായി ബന്ധിപ്പിച്ച് ബാബുവിനെ മണിക്കൂറുകള്‍ നീണ്ട് പ്രയത്‌നത്തിലൂടെ,സൈനീകര്‍ മലമുകളില്‍ എത്തിയ്ക്കുകയായിരുന്നു.

ഏകദേശം രണ്ട് രാത്രിയ്ക്കും ഒരു പകലിനും ശേഷമാണ് ബാബുവിന് ഇന്ന് രാവിലെ കുടിവെള്ളവും ഭക്ഷണവും എത്തിച്ചുനല്‍കുന്നതിനുള്ള രക്ഷപ്രവര്‍ത്തകരുടെ നീക്കം വിജയിച്ചത്.

700 അടിയോളം താഴെ മലയിടുക്കില്‍ കുടുങ്ങിയ ചേറാട് സ്വദേശിനി റഷീദയുടെ മകന്‍ ബാബു(23)വിനെയാണ് കരസേന ഏറെ ദുര്‍ഘട സാഹചര്യത്തില്‍ നിന്നും രക്ഷിച്ച് ജീവിതത്തിലേയ്ക്ക് തിരിച്ചുകൊണ്ടുവന്നിട്ടുള്ളത്.

ഇന്നലെ രാത്രി 11 മണിയോടെ സ്ഥലത്തെത്തിയ സേനാംഗങ്ങള്‍ മലയിലൂടെ ബാബു കുടുങ്ങിയ ഭാഗത്തേയ്ക്ക് എത്താന്‍ നീക്കം ആരംഭിച്ചിരുന്നു.ഇതാണ്് നേരം പുലര്‍ന്നതോടെ ഫലപ്രാപ്തിയിലേയ്ക്ക് എത്തിയത്.

ബാബു തന്നെയാണ് മൊബൈലില്‍ നിന്നും വിളിച്ച് താന്‍ അപകടത്തില്‍പ്പെട്ട വിവരം സുഹൃത്തുക്കളെയും അഗ്നിരക്ഷസേനയെയും അറിയിയ്ക്കുന്നത്.മലമുകളിലേയ്ക്ക് കയറുന്നതിനിടെ കാല്‍വഴുതി താഴേയ്ക്ക് വീണതിനെത്തുടര്‍ന്നാണ് ബാബു പാറയിടുക്കില്‍ കുടുങ്ങിയത്.ഇന്നലെ ഉച്ചയോടെ ഡ്രോണ്‍ പറത്തിയാണ് ബാബു എത്തപ്പെട്ട പാറയിടുക്ക് രക്ഷപ്രവര്‍ത്തകര്‍ കണ്ടെത്തിയത്.

രക്ഷദൗത്യത്തിന് മുഖ്യമന്ത്രി കരസേനയുടെ സഹായം അഭ്യര്‍ത്ഥിച്ചിരുന്നു.ഇതെത്തുടര്‍ന്നാണ് ഇന്നലെ രാത്രി കൊച്ചിയില്‍ നിന്നും കരസേനയുടെ സംഘം ചേറാട് മലയില്‍ എത്തിയത്

ബാബുവും മറ്റ് രണ്ട് കുട്ടികളുമായി ചേര്‍ന്നാണ് മലമ്പുഴ ചെറാട് മലയുടെ ചെങ്കുത്തായ കുറുമ്പാച്ചി മലയിലേക്ക് കയറിയത്. എന്നാല്‍ കുട്ടികള്‍ രണ്ടുപേരും പകുതിയെത്തിയപ്പോള്‍ തിരികെ പോയി. ബാബു മലമുകളിലേയ്ക്ക് കയറുകയായിരുന്നു.

മലയുടെ മുകളില്‍നിന്ന് കാല്‍ തെന്നിവീണ ബാബു പാറക്കെട്ടിനിടയില്‍ കുടുങ്ങുകയായിരുന്നു.താഴെയുള്ളവരെ ബാബു ഫോണില്‍ വിവരമറിയിച്ചു.ചിലര്‍ മലമുകളിലെത്തി ബാബുവിനെ രക്ഷിക്കാന്‍ ശ്രമിച്ചെങ്കിലും സാധിച്ചില്ല.

തുടര്‍ന്ന് നേരം ഇരുട്ടിത്തുടങ്ങിയതോടെ അവര്‍ തിരിച്ചുപോന്നു. അപ്പോള്‍ ബാബു തന്നെ അപകടത്തില്‍പ്പെട്ട വിവരം തന്റെ ഫോണില്‍നിന്ന് അഗ്നിരക്ഷാസേനയെ വിളിച്ചറിയിക്കുകയായിരുന്നു.

1 / 1

❮ ❯