കോതമംഗലം:ദൈവവഴിയിലെ നിറസാന്നിദ്ധ്യം സാധു ഇട്ടിയവിരയ്ക്ക് നൂറിന്റെ നിറവ്.

മികച്ച സാമൂഹിക പ്രവർത്തനത്തിനുള്ള അന്തർദേശീയ ബഹുമതിയായ ആൽബർട്ട് ഷെയിറ്റ്‌സർ അവാർഡ് ഉൾപ്പെടെ നിരവധി ബഹുമതികൾ സ്വന്തമാക്കിയ കോതമംഗലം ഇരമല്ലൂർ പെരുമാട്ടിക്കുന്നേൽ സാധു ഇട്ടിയവിരക്ക് 100 വയസ് പിന്നിട്ടു.

ദൈവസ്‌നേഹത്തിന്റെ മഹത്വവും ശക്തിയും സഹജീവികളെ പറഞ്ഞ് പഠിപ്പിക്കാൻ സാധു നടത്തിയ ഇടപെടലുകൾ വേറിട്ടുനിൽക്കുന്നതാണ് എന്നാണ് ചൂണ്ടികാണിക്കപ്പെടുന്നത്.ഇതിനായി അദ്ദേഹം അനുഭവിച്ച കഷ്ടപ്പാടുകൾ ചെറുതല്ല.ചിലപ്പോഴൊക്കം വിശപ്പും ദാഹവുമെല്ലാം മാറ്റിവച്ചും നഗ്നപാദനായും അദ്ദേഹം ഇതിനായി കിലോമീറ്ററുകൾ സഞ്ചരിച്ചിട്ടുണ്ട്.വർഷങ്ങളോളം ഈ ലക്ഷ്യത്തിലേയ്ക്കായി സാധു പലനാടുകളിൽ ചുറ്റിക്കറങ്ങി.

നാലാൾ കൂടുന്നിടത്തെല്ലാം അദ്ദേഹത്തിന് പറയാനുണ്ടായിരുന്നത് ദൈവസ്‌നേഹത്തെക്കുറിച്ച് മാത്രമായിരുന്നു.മുഖത്തെ പുഞ്ചിരി അദ്ദേഹത്തിന്റെ മുഖമുദ്രയാണ്.വാക്കുകളിലും നോട്ടത്തിലും സ്‌നേഹം തുളുമ്പും.അതുകൊണ്ട് തന്നെ എവിടെച്ചെന്നാലും അർഹിക്കുന്ന പരിഗണന അദ്ദേഹത്തിന് ലഭിച്ചിരുന്നു.ലാളിത്യമാർന്ന ജീവിത ശൈലിയായിരുന്നു അദ്ദേഹം പിൻതുടർന്നിരുന്നത്.

1981 -ലാണ് ആൽബർട്ട് ഷെയിറ്റ്‌സർ അവാർഡ് സാധു ഇട്ടിയവിരക്ക്ലഭിക്കുന്നത്.മലയാളത്തിലും ഇംഗ്ലീഷിലുമായി ഏകദേശം 150-ഓളം പുസ്തകങ്ങളുടെ രചയിതാവുകൂടിയാണ് ഈ ദൈവദാസൻ.1983-ൽ അൽബേറിയൻ അന്തർദേശീയ അവാർഡ്,97-ൽ ദർശന അവാർഡ് 98-ൽ മങ്കുഴിക്കരി അവാർഡ് 2005-ൽ ബിഷപ് വയലിൽ അവാർഡ് എന്നിവയും ഇദ്ദേഹത്തിന് ലഭിച്ചു.

1960-ൽ പ്രസിദ്ധീകരിച്ച അദ്ദേഹത്തിന്റെ ആദ്യകൃതി പിതാവും പുത്രനും 80000 കോപ്പികൾ വിറ്റഴിക്കപ്പെട്ടു.ഇത് പത്തോളം ഇൻഡ്യൻ – വിദേശ ഭാഷകളിലേയ്ക്ക് മൊഴിമാറ്റം നടത്തിയിട്ടുണ്ട്.7000-ത്തിൽപ്പരം ലേഖനങ്ങളും എഴുതിയിട്ടുണ്ട്.

കോട്ടയം ജില്ലയിലെ പാലാ കൊല്ലപ്പള്ളി പെരുമാട്ടിക്കുന്നേൽ മത്തായിയുടെയും അന്നമ്മയുടെയും 5 -ാമത്തെ മകനായി 1922 ലാണ് ഇട്ടിയവിരയുടെ ജനനം.1978 ൽ തന്റെ 56-ാം വയസിലാണ് തിരുവല്ല മണലേൽ ജോസഫ് – മറിയാമ്മ ദമ്പതികളുടെ മകൾ ലാലിയെ വിവാഹം കഴിച്ച് കുടുംബ ജീവിതം ആരംഭിക്കുന്നത്.

മകൻ ജിജോ ഹൈസ്‌കൂൾ അദ്ധ്യാപകനാണ്.ജിജോയുടെ ഭാര്യ ജെയ്സി, ചെറുമകൾ എമ്മ എന്നിവർ അടങ്ങുന്നതാണ് കുടുംബം.കാണാൻ എത്തുവന്നരോട് ആവും വിധം ദൈവസ്‌നേഹത്തെക്കുറിച്ച് ഇന്നും സാധു ഇട്ടിയവിര വാചാലനാവും.സ്‌നേഹത്തിന് മേലെ മറ്റൊന്നുമില്ല.പരസ്പരം സ്‌നേഹിച്ചാൽ എല്ലാം ശരിയാവും.സാധു പുഞ്ചിരിയോടെ പറയുന്നു.

സാധു ഇട്ടിയവിര സ്‌നേഹസംസ്‌കാരത്തിന്റെ പ്രവാചകൻ:മാർ ജോസഫ് കല്ലറങ്ങാട്ട്

കൊച്ചി:ക്രൈസ്തവ സമൂഹത്തിലെ സഞ്ചരിക്കുന്ന പാഠപുസ്തകവും,സമകാലിക ലോകത്തിന് ഒരു പുതിയ സ്‌നേഹസംസ്‌കാരവും പ്രദാനം ചെയ്ത വ്യക്തിയാണ് സാധു ഇട്ടിയവിരയെന്ന് സീറോമലബാർ സഭയുടെ കുടുംബത്തിനും അൽമായർക്കും ജീവനും വേണ്ടിയുള്ള സിനഡൽ കമ്മീഷൻ ചെയർമാൻ മാർ ജോസഫ് കല്ലറങ്ങാട്ട് അഭിപ്രായപ്പെട്ടു.

തന്റെ ബാല്യ-കൗമാരങ്ങളിലും,മെത്രാൻ ശുശ്രൂഷയിലും ഏറെ സ്വാധീനിച്ച വ്യക്തിത്വമാണ്. ഇന്നത്തെ ലോകത്തിലെ സഞ്ചരിക്കുന്ന സിനഡിനു സമാനമാണ് ഇട്ടിയവിര സാറിന്റെ ജീവിതം.എല്ലാവരെയും ഉൾക്കൊള്ളുന്ന പ്രകൃതവും,പ്രായ- ദേശ-അവസ്ഥാ വ്യത്യാസമില്ലാതെ വി.പൗലോസിനെപ്പോലെ തന്നെ കണ്ടുമുട്ടുന്ന എല്ലാവരോടും സ്‌നേഹത്തിന്റെ സുവിശേഷം പ്രസംഗിക്കുന്ന സവിശേഷ പ്രകൃതവുമാണ്.

ദൈവസ്നേഹത്തിന്റെ വഴിയിലൂടെ നടക്കുവാൻ ആഗ്രഹിക്കുന്നവർക്ക് ലാളിത്യവും മനുഷ്യത്വവും കൊണ്ട് മാതൃക കാണിച്ചു.കർമ്മം കൊണ്ടും ജീവിത സാക്ഷ്യം കൊണ്ടും ആധുനിക ലോകത്തിലെ വലിയ അൽമായ പ്രേഷിതനായി സാധു ഇട്ടിയവിര ഇന്നും നിലകൊള്ളുന്നുവെന്നും മാർ കല്ലറങ്ങാട്ട് പറഞ്ഞു.

ദൈവസ്‌നേഹവും സഹോദരസ്‌നേഹവും ജീവിതവ്രതങ്ങളായി സ്വീകരിച്ചിരിക്കുന്ന അദ്ദേഹത്തിന്റെ ശാസ്ത്ര സാങ്കേതിക വിഷയങ്ങളിലുള്ള അന്വേഷണതൽപരത പ്രത്യേകം പ്രസ്താവ്യമാണ്.’ദൈവം സ്‌നേഹമാണ്’ എന്ന് ലോകത്തോട് വിളിച്ചുപറഞ്ഞ ജീവിത ചിന്തകൾ കൊണ്ടും പ്രവർത്തികൾ കൊണ്ടും സമ്പന്നമാണ് അദ്ദേഹത്തിന്റെ ജീവിതം.നൂറാം വയസ്സിലും വളരെ ഊർജസ്വലതയോടെ ദൈവവചനങ്ങൾ ഉരുവിട്ടും പഠിപ്പിച്ചും ജീവിക്കുന്ന അദ്ദേഹം സഭയ്ക്കും സമൂഹത്തിനും വലിയ പ്രചോദനമാണെന്നും മാർ കല്ലറങ്ങാട്ട് ഓർമ്മിപ്പിച്ചു.അദ്ദേഹത്തിന്റെ നൂറാം ജന്മദിനാഘോഷത്തിന്റെ ഭാഗമായുള്ള അൽമായ കമ്മീഷന്റെ ആദരിക്കൽ ചടങ്ങിൽ പ്രസംഗിക്കുകയായിരുന്നു അദ്ദേഹം.

കോതമംഗലത്തെ ഇരമല്ലൂരിലെ സാധു ഇട്ടിയവിരയുടെ വസതിയോടനുബന്ധിച്ചുള്ള ജീവജ്യോതിയിൽ നടന്ന സമ്മേളനത്തിൽ അദ്ദേഹത്തെ പൊന്നാട അണിയിച്ചും,ഉപഹാരം നൽകിയും മാർ കല്ലറങ്ങാട്ട് ആദരിച്ചു.സീറോ മലബാർ സഭ പ്രോലൈഫ് എക്‌സിക്യൂട്ടീവ് സെക്രട്ടറി സാബു ജോസ് അധ്യക്ഷനായിരുന്നു.അന്തർദേശീയ മാതൃവേദി ജനറൽ സെക്രട്ടറി റോസിലി പോൾ തട്ടിൽ,ജിജോ ഇട്ടിയവിര തുടങ്ങിയവർ സംസാരിച്ചു.അൽമായ ഫോറം സെക്രട്ടറി ടോണി ചിറ്റിലപ്പിള്ളി ചടങ്ങുകൾക്ക് നേതൃത്വം നൽകി.സാധു ഇട്ടിയവിര മറുപടി പ്രസംഗവും നടത്തി.

1 / 1

❮ ❯