മുവാറ്റുപുഴ;ഉല്ലാസ യാത്രയ്ക്ക് ബുക്കുചെയ്ത ബസ്സിൽ വിദ്യാർത്ഥികൾക്കും അധ്യാപകർക്കും അനുഭവിക്കേണ്ടിവന്നത് നകയാതന.മുവാറ്റുപുഴ നിർമ്മല കോളേജിൽ നിന്ന് കൂർഗിലേക്ക് പുറപ്പെട്ട വിനോദ യാത്ര സംഘം ദുരിതപർവ്വം താണ്ടിയാണ് നാട്ടിൽ തിരിച്ചെത്തിയത്.സംഭവത്തിൽ ബസ് ജീവനക്കാർ അടക്കം 5 പേർ അറസ്റ്റിൽ.

നായരമ്പലം സ്വദേശിയായ നിധീഷ് ,സുൽത്താൻബത്തേരി സ്വദേശിയായ അനൂപ് ,കാലടി സ്വദേശികളായ റിജോ ,പ്രവിൺ അങ്കമാലി സ്വദേശിയായ ബേസിൽ എന്നിവരെയാണ് സംഭവവുമായി ബന്ധപ്പെട്ട് മൂവാറ്റുപുഴ പോലീസ് അറസ്റ്റുചെയ്തിട്ടുള്ളത്.

വ്യാഴാഴ്ചയാണ് അങ്കമാലി ആസ്ഥാനമായുള്ള ഗ്രീൻ കേരള എന്ന ടൂർ കമ്പനി ഏർപ്പാട് ചെയ്ത ബസ്സിൽ 30 ആൺകുട്ടികളും 23 പെൺകുട്ടികളും 3 അധ്യാപകരും അടക്കമുള്ള സംഘം കൂർഗിലേക്ക് പുറപ്പെട്ടത്. വാഹനത്തിന്റെ ചുമതലക്കാരായി ഡ്രൈവർ ഉൾപ്പെടെ 5 പേരാണ് കയറിയത്. ഇവർ യാത്ര തുടങ്ങിയപ്പോൾ മുതൽ ക്യാബിനിൽ ഇരുന്ന് മദ്യപിക്കുകയും പുകവലിക്കുകയും വിദ്യാർത്ഥികളോട് അപമര്യാദയായി പെരുമാറുകയും ചെയ്തതായി അധ്യാപിക പറയുന്നു.

ഭക്ഷണവും താമസവും അടക്കമുള്ള ടൂർ പാക്കേജാണ് ഗ്രീൻകേരളം വാഗ്ദാനം ചെയ്തിരുന്നത്.ഇതിനായി രണ്ടര ലക്ഷത്തോളം രൂപ നൽകുകയും ചെയ്തു.എന്നാൽ നേരാം വണ്ണം ഭക്ഷണം നൽകുകന്നതിനോ പ്രഥമീക കൃത്യങ്ങൾക്കുള്ള സൗകര്യം ഒരുക്കുന്നതിനോ പോലും ബസ്സ് ജിവനക്കാരുടെ ഭാഗത്തുനിന്ന് ഇടപെടൽ ഉണ്ടായില്ല എന്നാണ് അധ്യപകരും വിദ്യാർത്ഥികളും വെളിപ്പെടുത്തിയിട്ടുള്ളത്.

യാത്രയിൽ ലഭിച്ച പഴകിയ ഭക്ഷണം കഴിച്ചതിനെത്തുടർന്ന് 21 വിദ്യാർത്ഥികൾക്ക് ഭക്ഷ്യവിഷബാധയുണ്ടാവുകയും ഇവർ ശർദ്ദിച്ച് അവശരാകുകയും ചെയ്തിരുന്നു. വൃത്തിഹീനമായ ടോയിലറ്റിൽ പോകാൻ വിദ്യാർത്ഥിനികൾ വിസമ്മതിപ്പോൾ വിജനമായപ്രദേശത്ത് പാതവക്കിൽ വാഹനം നിറുത്തിത്തരാം,കാര്യം സാധിച്ചോളാനായിരുന്നു ബസ്സ് ജീവനക്കാരുടെ പ്രതികരണം.

സഹികെട്ടപ്പോൾ പ്രതികരിച്ച തങ്ങളെ ബസ്സ് ജീവനക്കാർ ആക്രമിക്കാൻ മുതിർന്നെന്നും ഈ ഘട്ടത്തിൽ കുഞ്ഞുങ്ങളെ ഒന്നും ചെയ്യരുതെന്ന് പറഞ്ഞ് അധ്യാപിക കൈകൂപ്പി അപേക്ഷിച്ചെന്നും തുടർന്നാണ്് ഇവർ അടങ്ങിയതെന്നും വിദ്യാർത്ഥികൾ പറഞ്ഞു.ബസ്സിൽ നിന്നറങ്ങി പാതയോരത്ത് നിന്ന് ശർദ്ദിച്ച പെൺകുട്ടികളെ തിരികെ കയറ്റാതെ വാഹനം പോകുമെന്നും പറഞ്ഞ് ഭീഷിണിപ്പെടുത്തിയും കളിയാക്കിയുമൊക്കെ ബസ്സ് ജിവനക്കാർ ആനന്ദിച്ചെന്നും ഇത് അവശരായ വിദ്യാർത്ഥികളെ വല്ലാതെ വിഷമിപ്പിച്ചെന്നും അധ്യാപകർ വെളിപ്പെടുത്തി.

ഇതിനിടെ ബസ് മാഹിയിൽ എത്തുമ്പോൾ ഇറക്കി വിടുമെന്ന് ഭീഷണിപ്പെടുത്തി 18000 രൂപ ബസ്സ് ജീവനക്കാർ തങ്ങളിൽ നിന്നും വാങ്ങിയെന്നും യാത്രക്കാർ വ്യക്തമാക്കി.വീട്ടുകാരെ വിളിച്ച് തുക സംഘടിപ്പിച്ച് നൽകിയ ശേഷമാണ് ഇവരുടെ ഭാഗത്തുനിന്നും ഭീഷിണി ഒഴിവായതെന്നും യാത്രയ്ക്കിടെ പലവട്ടം ബസ് നിറുത്തിയിട്ട് ജീവനക്കാർ കിടന്നുറങ്ങുകയെന്നും ഇതുമൂലം കൊടുംചൂടിൽ വല്ലാതെ വിഷമിച്ചെന്നും വിദ്യാർത്ഥികൾ പറയുന്നു.

രാവിലെ 11 മണിക്ക് വാഹനം കോളേജിലെത്തുമെന്നായിരുന്നു രക്ഷകർത്താക്കളെ അറിയിച്ചിരുന്നത്.ഇതുപ്രകാരം ഇവർ കൃത്യസമയത്തുതന്നെ കോളേജിൽ എത്തുകയും ചെയ്തിരുന്നു.എന്നാൽ രാത്രി 9 മണിയോടെയാണ് ബസ് എത്തിയത്.രാത്രി ബസ് എത്തിയപ്പോൾ രക്ഷകർത്താക്കളും അധ്യാപകരും വിദ്യാർത്ഥികളും അടക്കം മുന്നൂറോളം പേർ തടിച്ചുകൂടിയിരുന്നു.

വിവരമറിഞ്ഞ് മുവാറ്റുപുഴ പോലീസ് ഉടൻ സ്ഥലത്തെത്തി. രാത്രി തന്നെ അധ്യാപികയുടെ പരാതിയിൽ ബസിൽ ഉണ്ടായിരുന്ന കോളേജ് യൂണിയൻ വൈസ് ചെയർപേഴ്‌സന്റെയും മറ്റൊരു വിദ്യാർത്ഥിയുടെയും മൊഴി പോലീസ് രേഖപ്പെടുത്തി. ഇതിനിടെ ആരോ ബസിന് കല്ലെറിഞ്ഞതായി കാണിച്ച് ടൂർ ഓപ്പറേറ്ററുടെ പരാതിയും പോലീസിൽ എത്തിയിട്ടുണ്ട്.

1 / 1

❮ ❯