ഇടുക്കി:അവിഹതത്തിന് തടസമായ ഭര്‍ത്താവിനെ ഒഴിവാക്കാന്‍ ഗള്‍ഫുകാരനായ കാമുകനൊപ്പം ചേര്‍ന്ന് നടത്തിയ നീക്കം പൊലീസ് പൊളിച്ചടുക്കി.പഞ്ചായത്തംഗമായ ഭാര്യയും കൂട്ടാളികളും അറസ്റ്റില്‍.

വണ്ടന്‍മേട്ടിലാണ് സംഭവം.വണ്ടന്‍മേട് പഞ്ചായത്തിലെ സിപിഎം സ്വതന്ത്ര അംഗം സൗമ്യ, കാമുകന്‍ വിനോദിന്റെ സുഹൃത്തുക്കളായ ഷാനവാസ്, ഷെല്‍ഫിന്‍ എന്നിവരാണ് അറസ്റ്റിലായത്.

ഗള്‍ഫില്‍ ജോലിചെയ്യുന്ന കാമുകനൊപ്പം ജീവിക്കാന്‍ ഭര്‍ത്താവ് സുനില്‍ വര്‍ഗീസിനെ മയക്കു മരുന്ന് കേസില്‍ കുടുക്കാന്‍ സൗമ്യ നടത്തിയ തന്ത്രപരമായ നീക്കമാണ് വിശദമായ അന്വേഷണത്തിലൂടെ പോലീസ് പൊളിച്ചത്.

മയക്കുമരുന്ന് ഉപയോഗിക്കുകയോ വില്‍പന നടത്തുകയോ ചെയ്യാത്ത സുനിലിന്റെ സ്‌കൂട്ടറില്‍ നിന്ന് മാരക ലഹരിമരുന്നായ എംഡിഎംഎ കണ്ടെടുത്തിരുന്നു.ഒരു ചതി മണത്ത പൊലീസ് നടത്തിയ അന്വേഷണത്തിലാണ് സൗമ്യയും കാമുകന്‍ വിനോദും രണ്ടു സുഹൃത്തുക്കളും ചേര്‍ന്നൊരുക്കിയ കെണിയാണ് ഇതെന്ന് മനസിലായത്.

കഴിഞ്ഞ 22 നാണ് സുനില്‍ വര്‍ഗീസിന്റെ സ്‌കൂട്ടറില്‍ നിന്നും എംഡിഎംഎ പിടികൂടിയത്. വണ്ടന്‍മേട് പൊലീസ് ഇന്‍സ്‌പെക്ടറും എസ്പിയുടെ ഡാന്‍സാഫ് ടീമും ചേര്‍ന്നാണ് സ്‌കൂട്ടറില്‍ നിന്ന് മയക്കുമരുന്ന് കണ്ടെടുത്തത്.രഹസ്യ വിവരത്തിന്റെ അടിസ്ഥാനത്തിലായിരുന്നു പോലീസ് വാഹനം പരിശോധിച്ചത്.

തുടര്‍ന്ന് പൊലീസ് നടത്തിയ അന്വേഷണത്തില്‍ സുനില്‍ മയക്കു മരുന്ന് ഉപയോഗിക്കുന്നതായോ വില്‍പ്പന നടത്തുന്നതായോ കണ്ടെത്താന്‍ കഴിഞ്ഞില്ല.

വിശദമായ മൊഴി വീണ്ടും രേഖപ്പെടുത്തി അന്വേഷണം നടത്തിയതില്‍ ഭര്‍ത്താവ് സുനിലിനെ ഒഴിവാക്കുന്നതിനായി ഭാര്യയും വണ്ടന്‍മേട് ഗ്രാമപഞ്ചായത്ത് മെമ്പറുമായ സൗമ്യ കാമുകനായ വിദേശ മലയാളി വിനോദും വിനോദിന്റെ സുഹൃത്ത് ഷാനവാസ് മറ്റും ചേര്‍ന്ന് കെണിയായിരുന്നു എതെന്ന് വ്യക്തമായത്.

മയക്കുമരുന്ന് കേസില്‍ കുടുക്കാന്‍ ശ്രമിയ്ക്കുന്നതിന് മുമ്പ് സുനിലിനെ വാഹനം ഇടിപ്പിച്ചോ വിഷം നല്‍കിയോ കൊലപ്പെടുത്താന്‍ സൗമ്യയുടെ ഭാഗത്തുനിന്നും നീക്കം ഉണ്ടായതായുള്ള സൂചനകളും പോലീസിന് ലഭിച്ചു.

മാനസികമായി സുനില്‍ നിന്നും അകന്നു കഴിഞ്ഞിരുന്ന സൗമ്യ ഭര്‍ത്താവിനെ ഒഴിവാക്കുന്നതിനാണ് തന്റെ സുഹൃത്തിനോടൊപ്പം പദ്ധതി തയാറാക്കിയത്. കഴിഞ്ഞ 18 ന് വിനോദും സുഹൃത്ത് ഷാനവാസും ചേര്‍ന്ന് വണ്ടന്‍മേട് ആമയാറ്റില്‍ വച്ച് മയക്കു മരുന്ന് സൗമ്യയ്ക്ക് കൈമാറി.

സൗമ്യ ഇത് സുനിലിന്റെ ഇരുചക്ര വാഹനത്തില്‍ വച്ച ശേഷം അതിന്റെ ഫോട്ടോ എടുത്ത് കാമുകന് അയച്ച് കൊടുത്തു. പൊലീസിനും മറ്റ് അന്വേഷണ ഏജന്‍സികള്‍ക്കും വിദേശത്ത് ഇരുന്നു കൊണ്ട് വണ്ടിയുടെ പടവും ലഹരിമരുന്നുണ്ടെന്ന സൂചനയും നല്‍കി.

പൊലീസ് നടത്തിയ അന്വേഷണത്തില്‍ എംഡിഎംഎ ലഭിച്ചു. വിശദമായ അന്വേഷണത്തില്‍ സുനില്‍ നിരപരാധിയാണെന്ന് കണ്ടെത്തുകയും ചെയ്തു. ഒരു വര്‍ഷമായി സൗമ്യയും വിനോദും അടുപ്പത്തിലായിരുന്നു.

ഇടയ്ക്കിടെ വിദേശത്തു നിന്നും വന്നു പോകുന്ന കാമുകന്‍ വിനോദും സൗമ്യയും ഒരു മാസം മുന്‍പ് എറണാകുളത്ത് ആഡംബര ഹോട്ടലില്‍ റൂം എടുത്ത് രണ്ടുദിവസം താമസിച്ചാണ് ഗൂഢാലോചന നടത്തിയത്. ഇതിനു ശേഷമാണ് സൗമ്യയുടെ പക്കല്‍ ആമയാറ്റില്‍ മയക്കുമരുന്ന് എത്തിച്ചു കൊടുത്തത്.

താമസിയാതെ വിദേശത്തേയ്ക്ക് കടന്ന വിനോദിനെ തിരികെ എത്തിച്ച് അറസ്റ്റ് ചെയ്യുന്നുള്ള ശ്രമത്തിലാണ് പൊലീസ്. ഷാനവാസും ഷെഫിന്‍ഷായും ചേര്‍ന്നാണ് 45000 രൂപ വില വാങ്ങി വിനോദിന് മയക്കുമരുന്ന് എത്തിച്ചു കൊടുത്തത്.

ജില്ലാ പൊലീസ് മേധാവി ആര്‍ കറുപ്പസ്വാമിയുടെ നിര്‍ദ്ദേശപ്രകാരം കട്ടപ്പന ഡിവൈ.എസ്പി വി എ നിഷാദ് മോന്റെ കേസ് അന്വേഷണത്തിന് തേൃത്വം നല്‍കി.

വണ്ടന്‍മേട് ഇന്‍സ്‌പെക്ടര്‍ വി എസ് നവാസ്, ഇടുക്കി ഡാന്‍സാഫ് അംഗങ്ങളായ ജോഷി , മഹേശ്വരന്‍, അനൂപ്, ടോം എന്നിവരും കട്ടപ്പന ഡിവൈ.എസ്പിയുടെ ടീമംഗങ്ങളായ എസ് ഐ സജിമോന്‍ ജോസഫ്, എഎസ്‌ഐ മാരായ ടോണി ജോണ്‍ വികെ അനീഷ് സിനിയര്‍ സിവില്‍ പൊലീസ് ഓഫീസര്‍മാരായ മൃദുല ജി. ഷിബു പി.എസ് വേണുഗോപാല്‍ , മഹേഷ് പി.വി എന്നിവര്‍ അന്വേഷണസംഘത്തില്‍ പങ്കാളികളായിരുന്നു.

ഇടുക്കി സൈബര്‍ സെല്ലിന്റെ ഇടപെടലും അന്വേഷണത്തില്‍ നിര്‍ണ്ണായകമായി.

1 / 1

❮ ❯